每逢農曆新年臨近，有唔少打工仔都望住果份年尾雙糧，期望過番個肥年。但好景不常，近年市道低迷，有打工仔抱怨，老細忽然話生意不景，拒絕發放今年份雙糧。以往年年出開，工人心態呢個本身係應得，依家忽然話無就無，到底老細有無權咁樣做?
遇到呢個情況，大家先要睇番自己簽過果份合約，裡頭對於花紅、雙糧或年終酬金嘅條款係點規定。《僱傭條例》11AA條指明，不論呢類年終酬金名稱為何，員工以往收開嘅，都應被列作合約權益，除非有書面條款作相反證明。所謂相反證明，就係老細有無喺合約裡頭列明年終酬金係屬於「賞贈性質」或「酌情發放」。如果合約內無呢啲條款，老細就不能夠單方面以生意不景為由，任意扣起員工應得嘅年終酬金。
另外有一種情況，合約雖然無列明「賞贈性質」或「酌情發放」，但就表示屬於「有條件性發放」，並唔係自動享有。例如，員工要喺指定期間內跑數達到某個指標，先可以獲得。咁呢個都唔係老細可以任意扣起，而係要客觀睇番員工表現或營業數字。只要滿足咗相關條件，老細就須按合約支付。
年近歲晚，亦有員工不幸食咗無情雞，仲未拎到份年終酬金，就要被迫離職。遇到呢個情況，大家就要睇睇本身公司規定嘅酬金期，係點計算。假設你果份年終酬金係合約福利，酬金期係由1月至12月，但到農曆新年先出，咁只要你已完成酬金期先離職，老細都要將整份年終酬金出番俾你。即使未完成酬金期，員工被解僱或裁員，只要做滿3個月或以上（首3個月試用期不計），仍可按比例獲得。不過要注意，自己辭職嘅員工不符合資格領取按比例計算年終酬金。